Герольд БЕЛЬГЕР:  
– Соңғы жылдары қазақ баспасөзінің сапалы серпін байқатқанын айтуым керек. Жақсы журналистер бой көрсетіп келеді. Әсіресе мені көреген, азулы, саяси және әлеуметтік жағынан алымды, індетіп жаза алатын жас қыз-келіншектердің қарымы қатты таңырқатып жүр. Мен «Қазақ», «Жас қазақ», «Түркістан», «Жас алаш», «Дат», «Халық сөзі», «Дала мен қала», «Алаш айнасы», «Айқын», «Қазақ әдебиеті» газеттерін тұрақты түрде оқып тұрамын. Онда біздің қоғамдық өміріміздің барлық қырын қамтитын салмақты, терең, өткір, өзекті, тарихи-әлеуметтік мәселені қозғайтын мақалалар көптеп басылады және осының бәрін орыстілді газеттердің өңі түгілі түсінде де қозғамайтыны өте өкінішті. Бұдан біздің мемлекетімізде «сенікі менікі түсінбейді» дейтін екі мемлекет, тұрғындардың екі табы қатар өмір сүретін сияқты әсер туады. Тіпті орыстар мен орыстілділер Қазақия елінде емес, басқа бір планетада өмір сүріп жатқан жоқ па осы деген ой туады. Солардың көпшілігінің қандай қоғамда тұратыны туралы түсініктері де жоқ сияқты. Олар тұмсығының астында не болып жатқанымен шаруасы жоқ, қараңғы қоймада өзін бөлектеп, оқшаулап алған данышпан секілді өмір сүреді. Бәрінен және бүкілінен өзін-өзі бөлектеп алып, нақтылы емес кеңістікте мағынасыз бос өмір сүріп жүргендер секілді.
Тап осы тәуелсіздік деп аталатын жылдарда осындай сезім менің жанымды жабырқатып, жай таптырмайды. Мәселе өткір, мен оны жаным шырқырағанша көріп, сезіп отырмын, ол болса тіпті тереңдеп барады, ал біздің ақылды бастарымыздың неге оны қозғап, ойланбайтыны маған түсініксіз. Уақыт өткен сайын бірқатар орыстілді газеттердің қазақ газеттеріне шолу жасауға жүгіретіні анық. Бірақ ол қандай шолулар? Мардымсыз, шолақ, үстірт, сауатсыз, менмен, біржақты, көз алдарқату үшін жасалған шолулар. Бұлай болмайды. Адамдарды топ-топқа бөліп, жіктемей, қолдан қарама-қарсы қойып салыстырмай, өзара түсіністікке бағыттап, жақындастырып, қоғамды біріктіріп, күшейте түсу керек. Қалай болғанда да көршімен қалай тұруды білу керек

http://www.halyksozi.kz/